Jon d’Alcanja Pescador de Deserta - Zizim Figuera

Pa mi, Zizim, naquel tempe ‘m ca nem sabia czê qu’era ecosistema ô ecologia e no entante, Ti Jon e tude sês cumpanher pescador jás sabia, sem nunca ninguém ter ês dezîde nada ô estudode na livre! Na mei daquel conversa, bem Ti Jon um mau lembrança n’ideia e chei de raiba, log el rancá ta contone dum vez cum Presidente de Câmara Municipal de Soncente, que tava estode ta mandá panhá catchorre e que ca queris mandá matás. Anton, resolvê mandá ba betás lá pa Deserta, godzide qu’era amdjor assim… Cosa que fui um ingone de matá! Quel tal Presidente, sem pensá, fazê um grande erro ecológico, que fui um verdader desgraça pa quel pove pescador, quê quês catchorre, que fome, ês pô ta tacá e ta cmê tude o quês pude e pudia otchá la pa Deserta… E fui assim, que desaparceba entre otes espécie quel célebre, bnite e rore LAGORTE de Djeu Roze, por nome de MACROSCINCUS COCTEI.

Obra incontornável de Zizim Figuera, sobre a ecologia, em ambas vertentes, a ambiental e a cultural, e a lição dos homens do mar, nestas ilhas e ilhéus de Cabo Verde. Obrigado, Zizim. Nuno Marques

Jon d’Alcanja Pescador de Deserta

(Santa Luzia / Djeu Brónc / Djeu Roze)

Num daquês dia ventose d’equinoce de Setembre, nôs grupe de caça submarina de Soncente parcê lá pa Calhau, ponta leste d’ ilha, sobede da tarde, moda era de custume, qu’ideia na ba da uns merguie la pa quês banda.

Vontade era grande, quê Mone Lela, Deus dal céu, amigue bedje e pescador d’experiença daquês costa, que tava vivê naquel tempe log n’entrada de Baía das Gatas, tava passá sê vida, tude vez que no parceba la pa quês banda de seu, ta despertone ideia naquês bonque de pexe tchmode mareloce (pexe parcide que badeje/merote) que tava parcê sempre naquel épca, lá pa quel mar de Calhau quel tava conchê mute bem, ondê que té jal tinha fete sês marcação de pesquer da lá de lorgue p’aquel Pedra Brónc de Ponta de Vulcão de Viana.

Inflizmente quel dia lassim, ideia de Mone Lela ca pegá, quê ideia era ote e mez pa sorte nô incontraba ta bem de mar Ti Manel de Matos, que Deus haja, e sê grupe, que tinha estode tude quel note lá p’aquês costa ta pescá num de sês bote de Calhau, quel ta tinha intregode na conta de sê cumpade e amigue Ti Jon d’Alcanja.

Tude nôs ba ijdá rastá bote, o qu’era sempre um prazer grande, só p’uvida quel cantiga moda um tchore dirigide, pa da pove coraja, naquel voz roque e baxim de Ti Jon d’Alcanja, de: - Ó sacada riba..., que tude gente tava sigui sem piá. Na mei daquel trabói de rastá bote, cumeçá um conversa entre Jurgim Fonseca e Ti Manel de Matos p’oiá s’el pudia imprestaba nôs quel bote a vela de seu pa no basse inda quel dia mez té Deserta (Ilha de Santa Luzia / Djeu Roze / Djeu Brónc) dasse um tchluff.

Ti Manel, bom home, que ca tava gostá nunca de dzê pove cma não, vrá dzene cma pa el ca tinha prublema, ma só que patron de bote la na Calhau era sê cumpade Jon d’Alcanja e só el é que pudia decidi! Pa nô falaba ma el. Anton, Jurgim, Djibla, Edgar Sousa, Rui Machado, Manecas Matos, Djô Borja, Julim de Siminhas e mi mez, tude nôs juntode, contente c’aquel ideia, quê pa nôs, talvez tava ta ba ser nôs primer viaja pa Deserta, o que sempre pa nôs fui um sonhe, mode fama de pra la ter tcheu pexe... No ba log ta corrê ter de Ti Jon perguntal czê quel tava otchá.

Ti Jon, pescador de “Costa e de Deserta”, marinher experimentode, pai de tonte geraçon de pescador daquês banda que prendeba pescá e navegá ma el, pô cara pa vente, na direção de Deserta, el vrá pa nôs ta espione na tude sê calma de custume traduzide naquel firmeza d’home de mar e na sê manera monse de falá, mei SanAnton, mei Soncente, el dzene:

- Ó nhis gente, s’ucis querê ba, nô ta bai! Só qu’uli um hora da tarde e dali a três hora nô n’tita ba podê passá quel Canal de Soncente / Santa Luzia sem moiá!

Jurgim, armode em bom, ta dá pa esperte e valente, bem log que sê gargantona de gaita ta mandá boca, log ta contrariá Ti Jon e ta dzê:

- Qual estória! Vamos embora, rapazes, pois tudo isto são tretas!

Godzide, o que Ti Jon tava ta dzê era amtira... Ti Manel fecá prop zarode q’atitude de Jurgim, mode sê bajofaria e pa do quel tinha cabode de dzê sem nium respeite pa quel home de mar na pessoa de Ti Jon d’Alcanja, mestre cunchide de tude pescador de costa de Soncente, SanNinclau e Sinagoga de SanAnton! Log Ti Manel rancá, el dal sê bom resposta e que razon:

- Jorge, Jorge, amdjor é bô uvi czê que cumpade Jon tita dzê! Quê, se bô ca sabê, el nascê, criá prei e ta conchê tude esse costa, sês mar e sês corrente, moda palma de sê mon…

Anton, Ti Jon, sempre na sê humildade, cuntinuá:

- Nhis gente, só esse quebra c’um está é que ta fezem ba longá ucis té Deserta!

Jal tchemá sês cumpanher Bastion, Gustim, mnine de sê scola, ma quel gigante dum broce só por nome de Nhô Jon Monque, que tinha pirdide quel ote broce ta trá lin de pardal naquês poce d’aga lá pa quês compe. Jurgim quel dia ca tava que sorte, quê, pa mode prisença de Jon Monque, el torná mandá más um boca infliz:

- Como é que é? Lá vamos levar este homem connosco? Ele só vai ocupar mais um lugar no barco!

Tude nôs espiá pa Jurgim, chatiode, sem dzel nada ma que graça de mandal calá boca. Ti Jon, ote vez que sê calma, sem zangá, vrá pa Jurgim, el pô cosa na lugar de sê manera:

- Senhor Jorge, o que ocê n’sebe é qu’esse home que t’ei, um vez na Deserta no bibê um aga mariode, se n’era el, nôs tude tava merrê! Quê el só que sê broce fezê tude manobra que bote, pô vela e trezê nôs tude pa casa, c’ajuda de Deus!

Tempe já ca tava pa más conversa, log pa depressa fui preparode tude pa quel viaja. Tude gente linhá. Ti Jon destribuine dentre de bote, cada um na sê lugar, pa equilibrá e sempre ta dzene cma maré já tava vrode e que no tava ta ba moiá… e drete!

´M ca nem sabê cmanera explicá ô manifestá do que nô sinti naquel hora e meia ô dôs ta travessá quel inferre de Mar de Canal… Basta boca quel tarde dá nôs tude goste de sabon! Jurgim, sentode lá na sê lugar ondê que Ti Jon tinha el puste, tava cum carinha mode mei toston, ca tava nem ta piá nem mexê quê, pa de pressa, el comprendê situaçon!

Ti Jon, pegode na leme de sê bote nem um GRANDE CAPTON quel era, Gustim ma Bastion na vela, que Jon Monque ta esgotá ága de bote c’aquel lata de pitrol, rapte dmunde e cum broce só! Nôs butim, valente, que sê vela chei de vente, além ta bai, ta bai, ta sebí, ta dexí na mei de brónc daquês castel de mar, ta bai nem um cavalim de currida, ta ratchá aga cum força matá e Deus ta cumpanhone!

Um verdader escola d’arte de navegá de Ti Jon, pa fazê calá boca tude valenton e bajofe desse munde pôs quel Canal que ta lá n’é de brincadera de mnine d’escola quê el tem levode tcheu vida de pescador, sobretude naquel Ponta de Vulcon de Viana, moda Ti Jon bem contame despôs! Pa camin no cruzá uns seis o sete bote de pesca, já ta bem de volta de Deserta. Quaz tude ês, bedje que nove naquês bote, tava conchê e respeitá Ti Jon d’Alcanja. Normalmente, quel hora lá era de bem e não de bai pa Deserta, pa mode era hora de vrada de maré ma currente! Anton, tude quês cumpanher de mar, espantode, que sês bote ta passá rojadim na nôs, dá Ti Jon fala:

- Ó Jon d’Alcanja, czê que bô tem na quebeça? Bô n’tita oá ês cestel mar ma esse meré?! Cmenera Jon, já bô perdê quebeça?! Ô bô inganá?! Onje de bô guarda, Sonte de bô nome, Jon!

Ti Jon, muque, imbutchode sem podê dás resposta, cuntinuá pegode na sê leme, t’uvi quês palavra dure de sês cumpanher de mar de tude dia. Ma na funde el sabia quês tinha razon e quês tava ta dzel assim era pa sê bem, mode mizade e respeite quês tinha pa el. Ma naquel hora lassim, Ti Jon ca tinha jete pa dasse ninguém explicaçon, quê quel mar revultiode ca tava nem ta dexá… Só o quel pude dzê nòs, naquel hora, fui cma quês lá n’era pescodor de Selamansa ma sim pescodor de Senagoga - SanAnton, carregode de PTIM de CAGARRA, bem gorde ta bem de Deserta pa casa!

Viaja cuntinuá na mei daquel vente e mar, que nôs ma Ti Jon e quel butim ora ta sebí, ora ta dexí, ora ta mandá largá vela, mode rajada… Vrá de popa pa onda, corrê, corrê, corrê, panhá vela ote vez, proveitá, buliná, buliná, buliná na direçon de Stª. Luzia, ága e más ága pa derriba de nôs! Quê lá ca tinha perdon!

Despôs de tude aquel vintura durante quaz duas hora, no tchegá na porto de salvamente, dentre de Baía de Stª. Luzia (Purtim), mar já um csinha más bronde e gente tude moiode, moda uns ptim de galinha na dia de tchuva.

Naquel tarde, fui desimbarcá, muntá tenda, fazê quel fagon de três pedra e prepará um café quente, pa nô pudia matá quel frieza de mar. Intcharcode moda no tava, ropa fui tude trode, puste derriba de pedra ta secá. Flizmente, note tava quente. Tempe que tive fui de só tmá quel golpada d’aga quente e procurá log jete de ba descansá corpe um bocode, quê note tava ta ba ser grande e no dia seguinte no tinha que estode em forma pa quel fulguim pudesse guentá quês merguie.

Ti Jon ma sês cumpanher, ês ba fatchá pa praia que sês luz de fotche de pitrole pa panhasse plarde (quês carangueje bronque de praia), bom isca pa linha de pesca. Era ba ta panhasse, ba ta cortás sês pinça pês ca cmesse cumpanher e ba ta metês num lata. Assim ês tava usás pa pescá lá na Dserta e de volta pa Calhau ês ta tinha inda isca pa tcheu dia, quê quês praia lá deboxe quaz que já ca tinha plarde… e pesca era tude sustente de vida de sês casa!

Cma lá na tenda quês carrangueje ca tava ta dexá gente durmi, quê ês tava fecá só ta corrê dentre e ta querê mordê gente na pé… Anton, ‘m ba cumpanhá Ti Jon ma sês colega na praia pa ijdás panhá plarde. Logue quonde um tchegá, moda era custume e pa respeite, um estendel nha mon, um dzel:

- Cê betame bençon, Ti Jon.

Lá Ti Jon, cma el tava concheme desde piqnim, fecá tude contente, el dzeme «Ó, Izizim (moda el tava custumá tchemame), Deus bençuobe nha fi, onje de bô guarda sonte de bô nome e obrigode p’esse ajuda, quê sempre é bom más um broce.

Anton, naquel praia de note, deboxe daquel luz de cafotche, fui um verdader riqueza d’escola de vida, daquês cosa que ta marcá um pessoa pa tude tempe, quonde bô ta cumeçá ta prendê orija de cosa...

Quê Ti Jon ba ta contá nôs uns data de Storia de Deserta e ses bitche (Cagarra, Robe Junque, Fregata ma quês Lagorte q’um vez tinha) e pescador ma sês pesca, sês luta pa subrevivência naquel munde de seus. No entante, Ti Jon ca sabia nem lê nem escrevê, ma culpa n’era de seu de ter nascide na pobreza!

Ma, el na sê munde, de programação cosmica, fui formode e formá um data de gente n’arte de navegá, prindide ma sê falecide pai Antuzim, home de mar também cunchide e respeitode de tude quel pove pescador.

Formode na maré, na currente de mar, na ecologia e más cosa d’admirá, que quonde gente querê uvi, gente ta podê e sabê apreciá expriença de vida prática dum bedje lobe de mar moda Ti Jon d’Alcanja! Nhas gente, lá é que t’oiode cma “Inteligência, dvera, dvera, é Universal” e nada tem a ver q’instrução…

Conversa continuá nimode, na luz de cafotche daquel praia, ma Ti Jon d’Alcanja e sês cumpanher, sempre priucupode c’aquel tempe, qu’era tempe de panhá CAGARRA na Deserta e que té inda ês n’tinha bode panhá sês parte lá na Djeu Roze!

Um vrá, sem pensá, um dzel:

- Ma quês otes pescador de Senagoga ma SanNiclau ca tita ba dexá bsote nada!

El espiame, que sês oie de gote e na expresson d’home serie quel era, el dzeme:

- Non, Izizim! Pescodor é pobre ma pa lei de DEUS no sebe parti nôs miséria!

Quel lição de vida cuntinuá na praia de Santa Luzia:

- Bô t’oá, quês dôs Djeu lá, Bronque ma Roze? Tude one, nesse tempe, quonde Deus querê, que ta tem tcheu CAGARRA e é one de fartura. No ta panhá um bocode de ptim MA NO CA TA PANHÁS TUDE, quê Deus Nosse Senhor n’ta fecá contente! Mez se nô panhás tude, czê que ta fecá pa nô panhá despôs?

Pa mi, Zizim, naquel tempe ‘m ca nem sabia czê qu’era ecosistema ô ecologia e no entante, Ti Jon e tude sês cumpanher pescador jás sabia, sem nunca ninguém ter ês dezîde nada ô estudode na livre! Na mei daquel conversa, bem Ti Jon um mau lembrança n’ideia e chei de raiba, log el rancá ta contone dum vez cum Presidente de Câmara Municipal de Soncente, que tava estode ta mandá panhá catchorre e que ca queris mandá matás. Anton, resolvê mandá ba betás lá pa Deserta, godzide qu’era amdjor assim… Cosa que fui um ingone de matá!

Quel tal Presidente, sem pensá, fazê um grande erro ecológico, que fui um verdader desgraça pa quel pove pescador, quê quês catchorre, que fome, ês pô ta tacá e ta cmê tude o quês pude e pudia otchá la pa Deserta… E fui assim, que desaparceba entre otes espécie quel célebre, bnite e rore LAGORTE de Djeu Roze, por nome de MACROSCINCUS COCTEI.

Quonde lagorte cabá, catchorre vrá ta tacá CAGARRA e otes bitche pês cmê. Anton, Ti Jon ma Bastion cambá morada, ba falá ma Ti Manel de Matos pas oiaba quel situação, quê cosa tava ta vrá prop fei e ca podia cuntinuá assim. Ês fui ubrigode a organizá e contratacá, inflizmente que pastel de venene, pa cababa c’aquês catchorre lá pa Dserta. Quê só assim, sem mundo sabê, quês pude inda salvá tude quel pove pescador de costa de Soncente/SanAnton/SanNiclau e sês família, que sempre vivê de PESCA e de CAGARRA, rique na proteína, de morrê de fome!

Ti Jon na sês lição, quê pa mim tude o quel tava ta dzeme era lição, sabia catalogá

tude quês posse d’orela de mar: Cagarra, Robe de Junque, Guintche, Maçarique-Real, Bicona, Canelona, Garça, Fregata, etc… E tude quês pexe d’isca, moda melon, na cicle de cadeia alimentar que tava cumeçá pa plancton, passode pa pexe de pé de pedra, moda garopa, merote, badeje, té tchegá na pexe de lorgue (pelágicos) moda atum, djeu, dorada, etc...

Mi que boca aberte e chei d’admiraçon t’uvi quel Home falá, quê sês lição era dum grande profundidade e dimensão, que n’altura ‘m ca tava atingi, basiode na experiença de vida… D’admirá! Ma só despôs de tonte one d’experiença de nha prop vida e de nhas escola q’um fazê é q’um bem cunsigui oiá tude quel riqueza exprimental, de sabeduria daquel Bedje Lobe de Mar!

Inda tive más e más storia pa camin, quê no tive que vrá pa tenda mode lata de pitrol já tava chei de carangueje e no tinha que ba descançá quê note já tava olte, que Lua lá na céu ta brilhá na mar.

Na dia seguinte, gente argui que Sol quente e malta ba tude pa mar. Caça submarina fui bom, quê nô trazê pexe pa casa e pa vezim, na mei de tude quel delire de juventude. Aquel camin de regresse fui calme, quê Ti Jon d’Alcanja, na sê expriença, calculá bem hora de largá e sube trazene pa casa na tude sigurança.

Pa nôs e em especial pa mi, na dvera, ca fui quel tal caça-submarina que fui más importante, naquês dôs dia passode na Deserta, mas sim quês lição de VIDA recibide daquês pescador de Deserta, moda TI JON D’ALCANJA MA SÊS CUMPANHER... SARAVAHHH...

Zizim Figuera (José Figueira, Júnior)